Iki kafedranın birgə seminarı
14.02.2020
Rezidentlər üçün növbəti ənənəvi seminar bu gün ATU-nun Tədris Cərrahiyyə Klinikasında Ağız və üz-çənə cərrahiyyəsi, Qulaq, burun və boğaz kafedralarının birgə iştirakı ilə keçirilib.
Xəstə təhlili ilə başlayan seminarda açılış nitqi ilə çıxış edən Ağız və üz-çənə cərrahiyyəsi kafedrasının müdiri, professor Çingiz Rəhimov 2011-ci ildən ölkəmizdə rezidentura məktəbinin təsis olunduğunu xatırladaraq ilk gündən rezidentlərlə işbirliyi yaratmağa çalışdıqlarını deyib: “Artıq onlar tələbəçilik əhvali-ruhiyyəsindən uzaqlaşmalı, kolleqalarımız kimi formalaşmalıdırlar. Biz rezidentlərdən referativ iş deyil, bu sahənin ən qabaqcıl məlumatlarını və təhlilini gözləyirik. Gərək bizi gündəlik bir ritmdə saxlasınlar ki, arxamızca kimlərin gəldiyini bilək. Vaxt etibarı ilə imkanlarının bizdən daha çox olduğunu nəzərə alsaq, onlardan gözləntilərimiz də böyükdür”.
Rezidentura şöbəsinin Tədris Cərrahiyyə Klinikası üzrə məsul şəxsi, assistent Namiq Xəlilov, Qulaq, burun və boğaz kafedrasının müdiri, professor Vəfa Pənahian hər iki kafedranıın birgə seminarlar keçirməsinin əhəmiyyətini, qarşılıqlı əməkdaşlığın gələcəkdə də davam etdirilməsinin vacibliyini vurğulayıblar.
Sonra Ağız, üz və çənə cərrahiyyəsi şöbəsinin V kurs rezidenti Pərvin Həsənova “Parotidektomiya əməliyyatı sonrası yaranan sinir patologiyaları və diaqnostikası”, Qulaq, burun və boğaz şöbəsinin II kurs rezidenti Dilarə Əzimli isə “Nazal poliplər” mövzusunda məruzə ilə çıxış ediblər.
Seminarın gedişində mövzulara dair suallar cavablandırılıb və geniş fikir mübadiləsi aparılıb.
